Astra quid efficiant veros monstrantia casus

Percipe, si quis ades recti servator honesti.

Hinc praescire licet quodcumque horoscopus acer

Intrat ingenium nobis nascentibus aevo

5

Quicquid et in reliquo convexi stantia mundi

Spatia portendent, quid prodigiosa cometes

Promittat sceptris, Erronum et nota potentum

Quicquid agat virtus et clari lumina Olympi

Te loquor, o Titan Phoebeque Hyperione nati

10

Praeterea advertam qui sit pote noscere sortem

Staminis atque atri fusus et iniqua sororum

Pensa colu diducta truci de fonte sophorum

Veridico causas (quas comprobet augur Apollo).

Edimus arcanis aditus veraxque Sybilla.

15

Quoque modo liceat fata extenuare futura

Et varios morbos ipsa ab radice docemus

Quove queat pacto quisquis sibi commoda vitae

Sumere de nostris poterit deprendere chartis

Praesentesque dies albo numerare lapillo

20

Doctus ab infausto calle avertisse iugales

Nempe suos quamquam adversetur Martia lampas

Falciferique senis liventia sydera surgant

Impetuosa nimis Venerique Iovique benigno

Sydera dum adspectu veniant radiantia laeva

25

Parte poli fiat praesto et caducifer alis

Ergo age, sed celeri passu quicumque fidelis

Hospes virtutis, venis hanc amplectere divam

Vnde avidum pectus saturetur et unde recedes

Ditior et pretiis et cognitione futuri

30

Vnde queas verus vates cognomine divum

Dicier: ipsa nisi haec virtus te stirpe potentum

Caelicolum esse satum nobis monstraret aperte

Pectore quod veniat sola amplexanda soluto

Argumenta damus: sedem sibi legit in arce

35

Aetherea regina poli celebrata Camoenis

Aemula consortum nunquam spectata suarum

Postmodo: cum nostris scriptis decoratus abibis

Officii ne forte parum memor esse feraris

Poscimus hoc tantum de te: bona vota precator.

40

Ioannique tuo cui dans Abiosa propago

Nomen in Adriacae devexit moenia terrae

Transigat exopta totos feliciter annos

Iamque vale lector studiumque appone libello

Propositum aggredimur stellarum lumine plenum.

Vale.